Magalir Mattum

உலக பத்திரிக்கை சுதந்திர தினம் 2010

2010-05-06T20:39:00.000-07:00

கடந்த 3 மே அன்று உலகளவில் கொண்டாடப்பட்ட பத்திரிக்கை சுதந்திர தினத்தையொட்டி சி. ஐ. ஜே எனும் தகவல் சுதந்திர மையம் எதிர்வரும் 8 மே 'மக்களிடையே ஒற்றுமையை, அமைதியை வளர்ப்போம் ' எனும் தலைப்பில் கலந்துரையாடல் ஒன்றினை ஏற்பாடு செய்துள்ளது. ஒரே மலேசியா எனும் கொள்கையை மையமாக கொண்டிருக்கும் நம் நாட்டில் மக்களுக்கு எம்மாதிரியான தகவல் மற்றும் பத்திரிக்கை சுதந்திரம் வழங்கப்பட்டிருக்கிறது , உண்மைகளை வெளியிடுவதில் பத்திரிக்கையாளர்கள் எதிர்நோக்கும் பிரச்சனைகள், அண்டை நாடுகளுடன் ஒப்பிடுகையில் நம் நாட்டின் பத்திரிக்கை சுதந்திரம் எந்த அளவில் இருக்கிறது என்பதனை மக்கள் அறிந்து கொள்வதற்காகத்தான் இந்த கலந்துரையாடல் ஏற்பாடு செய்யப்பட்டுள்ளது. ஆகையால் பொது மக்கள் திரளாக வந்து இந்த கலந்துரையாடலை சிறப்பிற்குமாறு அழைக்கபடுகின்றனர் .

நிகழ்ச்சியின் நிரல் பின்வருமாறு :

திகதி : 8 may 2010
இடம் : அனெக்ஸ் , ௨ வது மாடி, செந்திறல் மார்க்கெட்
நேரம் : கலை 10.30 - பிற்பகல் 1.30

மேல் விபரங்களுக்கு , சிவ் எங் என்பவரை 03-40230772 என்ற எண்ணுடன் தொடர்பு கொள்ளவும்.

அனைத்துலக பெண்கள் தினம் 2010 - பகுதி 1

2010-03-15T00:35:00.000-07:00

சர்வதேச பெண்கள் தினம் நூறாவது ஆண்டு-நாம் என்ன செய்யவேண்டும்:தேவகி

புராதன காலத்தில் கிரேக்கத்தில் போரை முடிக்கு கொண்டு வர பெண்கள் போராடினார்கள். 1789 இல் சமத்துவம், சுதந்திரம், பிரதிநிதித்துவம் கோரி பிரஞ்சு புரட்சியின் போது பெண்கள் அணிதிரண்டனர். எட்டு மணிநேர வேலை நேரம், பெண்களுக்கான வாக்குரிமை மற்றும் ஊதியம் தொடர்பான கோரிக்கைகளை முன் வைத்தாக இப்போராட்டம் அமைந்தது.

1848 இல் பிரான்சில் இரண்டாவது குடியரசை நிறுவிய மன்னன் பெண்கள் அரசவை ஆலோசனைக்குழுவில் இடம் பெறவும், பெண்களுக்கு வாக்குரிமை வழங்கவும் சம்மதம் வழங்கிய தினம் மார்ச் 8 ஆம் திகதியாகும்.

1869 இல் பிரித்தானிய பாரளுமன்றத்தில் முதல் முதலாக பெண்களுக்கான வாக்குரிமை பற்றி பேசப்பட்டது.

இவ்வரலாற்றுப்பின்னணியில் நாம் கிளாரா சற்கின் (Clara Zetkin)) அவர்களின் பாத்திரத்தை மறந்து விடமுடியாது. 1870 இல் யேர்மனிய சோசலிச இயக்கத்தில் தன்னை அமைப்பு ரீதியான பணியில் இணைத்துக் கொண்டவர். 1881 இல் சோசலிஸ்ற்றுக்களுக்கு எதிராக விசேட தடைச்சட்டம் கொண்டு வரப்பட்ட போது தலைமறைவுப் பணிகளில் ஈடுபட்ட இவர் மேலும் தனது பணிகளை பிரான்ஸ், இத்தாலி மற்றும் ஒஸ்திரிய நாடுகளின் சோசலிச இயக்கங்களில் தொடர்ந்தார். 1889 இல் இரண்டாம் அகிலத்தை நிறுவும் பேராயம் பாரீஸில் நடைபெற்றது. இதன் அமைப்பாளர்களில் ஒருவராக கிளாரா செயற்பட்டார். 1890 இல் யேர்மனி திரும்பிய இவர் சமூக ஐனநாயக கட்சியின் பெண்கள் இயக்கத்தின் தலைமைப் பதவியை ஏற்றார். சோசலிச தொழிற்சங்கங்களில் பெண்கள் அமைப்பாதல், தொழிலாளர் அமைப்புக்களில் பெண்களை இணைப்பதிலும் இவரது பங்களிப்பு கணிசமானது. சமத்துவம் பத்திரிகையின் பொறுப்பாசிரியராக கடமையாற்றிய வேளையில் பெண் தொழிலாளர்களின் நலன் குறித்து பல விடயங்கள் இப் பத்திரிகையில் வெளி வந்திருந்தன.

1910 இல் ஹோப்பன்ஹேகனில் நடைபெற்ற இரண்டாவது அகிலப்பேராயம் வயது வந்த அனைவருக்கும் வாக்குரிமை கோரிக்கையை வலியுறுத்தியது. மார்ச் 8 ஆம் திகதியை சர்வதேச பெண்கள் தினமாக பிரகடனப்படுத்த வேண்டும் எனும் அறிக்கையை கிளாரா சட்கின் அவர்கள் தயாரித்தார். இக்கோரிக்கை இப் பேராயத்தில் நிறைவேற்றப்பட்டது.

இலங்கையில் வாக்குரிமைக்கான போராட்டம்

டொக்டர் நல்லம்மா முருகேசு என்பவரால் பெண்கள் வாக்குரிமைக்கு சார்பாக கொண்டு வரப்பட்ட பிரேரணை 1919 இல் இலங்கை தேசிய காங்கிரசின் முதல் அமர்வின் போது நிறைவேற்றப்பட்டது. பெண்களின் வாக்குரிமைக்கான முக்கிய ஆதரவு 1920 இலிருந்து தொழிற்சங்க இயக்கத்திலிருந்தும், தீவிரவாத அரசியல் பிரிவுகளிடமிருந்தும் கிடைத்தது.

1927 இல் டொனமூர் ஆணைக்குழு இலங்கைக்கு வருகிறது. 1927 மார்கழி மாதம் இலங்கை பெண்களின் வாக்குரிமைச் சங்கம் உருவாக்கப்பட்டது. பெண்கள் தமது வாக்குரிமைக்கான கோரிக்கையை எழுத்து வடிவில் டொனமூர் ஆணைக் குழுவிடம் சமர்ப்பிக்க முடிவு செய்திருந்தனர். அக்னேஸ் டி சில்வா, நீல் குணசேகரா ஆகியோர் இக்கோரிக்கைக்கு ஆதரவான கையெழுத்து சேகரிப்பதில் ஈடுபட்டனர். ஆனால் கையெழுத்துக்களை சேகரிப்பது அவ்வளவு இலகுவாக இருக்கவில்லை.

”சில இடங்களில் எங்களைத் திரும்பி போகும்படி வந்த வழியைக் காட்டிவிட்டனர். சில பெண்களின் கணவன்மார் கையெழுத்திடுவதற்கு எதிர்ப்புத் தெரிவித்தனர். அப்படியிருந்தும் ஓய்வொழிச்சலற்ற றிக்க்ஷோ வண்டி ஓட்டத்தின் பின்னரும், அயராத முயற்சியின் பின்னரும் நாங்கள் பலவகைச் சமூகத்தையும், சாதிகளையும் சேர்ந்த பெண்களின் கையெழுத்துக்களைப் பெறுவதில் வெற்றி பெற்றோம “ என அக்னேஸ் அவர்கள் தெரிவித்திருந்தார். பெண்களின் வாக்குரிமை தொடர்பானதும் மற்றும் உரிமைகள் தொடர்பாக போராடியவர்கள் வரிசையில் மீனாட்சி நடேசய்யர், திருமதி ஆர். தம்பிமுத்து (இவருடைய சொந்த பெயரைக் கண்டுபிடிக்க முடியவில்லை. மன்னிக்கவும்) ஆகியோர் குறிப்பிடத்தக்கவர்கள்.

பெண்கள் வாக்குரிமை சம்பந்தமாக அபிப்பிராய பேதங்கள் ஏற்பட்டன. பொன்னம்பலம் இராமநாதன் போன்ற அரசியல்வாதிகளின் கருத்துப்படி “சகலருக்குமான வாக்குரிமை என்பது பன்றிகளின் முன் முத்தை விதைப்பது” போன்ற செயலாகும் என சொல்லப்பட்டது.

பெண்களின் வாக்குரிமை சம்பந்தமாக பலமான ஆதரவு, வடமாகாணத்தைப் பிரதிநிதிப்படுத்திய சட்டசபை உறுப்பினரான எஸ்.ராஜரத்தினம் அவர்களிடமிருந்து கிடைத்திருந்தது. “ஏன் நாங்கள் இலங்கையிலுள்ள பெண்களை அடிமைகளாகவோ, அரை அடிமைகளாகவோ பாவிக்க வேண்டும். அத்தோடு அவர்கள் தங்கள் வாக்குகளை நியாயமாகவே பாவிப்பார்கள் என்பது எமக்கு தெரிய வேண்டும் என்றார் “|( Hansard; vol. III, 1928: 1722).

காலனித்துவ நாடுகளில் இலங்கையே முதன் முதலில் வாக்குரிமையைப் பெற்ற நாடாகும்.1945 இல் சான் பிரான்சிஸ்கோவில் ஏற்படுத்தப்பட்ட (ஐ.நா வின்) சமஉரிமை மற்றும் பெண்களின் வாழ்க்கைத் தரத்தினை உயர்த்துதல், அடிப்படை உரிமை மேம்பாடு தொடர்பான உடன்பாடுகளுக்கமைய பெண்களுக்கான சமஉரிமை கோரிக்கை நிறைவேற்றப்பட்டது.

1975 ஆம் ஆண்டை சர்வதேச பெண்கள் ஆண்டாக ஐநா சபை அறிவித்தது. 1977 ஆம் ஆண்டு ஐநாவின் பொதுச் சபையில் சர்வதேச பெண்கள் தினத்தை ஐக்கிய நாடு பெண்கள் தினமாக கொண்டாட முடிவு செய்யப்பட்டது.

உலகளாவிய ரீதியில் தொடரும் போராட்டங்கள்

பெண்களது விடுதலைக்கான போராட்டமானது ஆரம்பத்தில் வாக்குரிமை தொடர்பாக தீவிரம் பெற்றாலும் கூட, காலப்போக்கில் அடுத்தடுத்த விடயங்கள் தொடர்பாகவும் இந்த போராட்டங்கள் தமது இலக்குகளை நகர்த்திச் சென்றன. சம வேலைக்கு, சம சம்பளம்: சொத்துடமை உரிமை: பிரசவகால விடுமுறை: விவாகரத்து உரிமை: கருத்தடை சாதனங்கள் மற்றும் கருக்கலைப்பிற்கான உரிமைகள்: பாலியல் தொல்லைகளுக்கு எதிரான போராட்டங்கள்……இப்படியாக இந்த போராட்டங்கள் இன்று வரையில் தொடர்ந்த வண்ணமே உள்ளன. இவற்றில் பலவற்றில் பெண்கள் வெற்றி பெற்றுள்ளார்கள். இன்னும் பலவற்றிற்காக போராடிக் கொண்டிருக்கிறார்கள். அல்லது போராடி பெற்றவைகளை மீண்டும் இழக்காமல் இருப்பதற்காக தீவிரமாக போராடியாகுமாறு நிர்ப்பந்திக்கப்பட்டிருக்கிறார்கள். இவற்றில் சில எமது நாடுகளைச் சேர்ந்த பெண்களுக்கு அதிகம் சிரமம் இல்லாமலேயே வந்து சேர்ந்துவிட்டன. இன்னும் பல இன்னமும் வந்தடையாமலேயே இருக்கின்றன. இவற்றைவிட எமது சமூகத்தின் குறிப்பான ஒடுக்குமுறை வடிவங்களுக்கு எதிரான போராட்டங்களை நாமேதானே முன்னெடுத்தாக வேண்டிய நிலையில் இருக்கிறோம். இப்படியாக பெண்களுக்கு எதிரான ஒடுக்குமுறைகளும், அவற்றிற்கு எதிரான போராட்டங்களும் உலகளாவியவையாக இருப்பதால் நாமும் உலகலாவிய அளவிலும், எமது குறிப்பான பிரச்சனைகள் தொடர்பான குறிப்பான விடயங்களையும் உள்ளடக்கியதாக நாம் போராடியே ஆகவேண்டிய நிலையில் உள்ளோம். இப்படிப்பட்ட நிலையில் இந்த விதமான கொண்டாட்டங்கள் எமது போராட்ட பாதையை நினைவு படுத்தவும், எமது முன்னோர்கள் போராடி எமக்காக பெற்றுத் தந்துவிட்டுச் சென்றுள்ள உரிமைகளின் பெறுமதிகளை அங்கீகரிக்கவும், இன்னமும் வெல்லப்படாத உரிமைகள் பற்றிய விழிப்புணர்வு பெறவும் உதவும். எம்மை சுற்றியிருப்பவர்களும், எமது குழந்தைகளும் இப்படிப்பட்ட நிகழ்வுகளில் கலந்து கொள்வதன் மூலமாக மட்டுமே விழிப்புணர்வு பெறுவர் என்பதால் இவை கற்பித்தல் மற்றும் பயிற்றுவித்தல் நோக்கிலும் முக்கியத்துவம் பெற்றதாக ஆகின்றன.

நாம் ஏன் கொண்டாட வேண்டும்?

கொண்டாட்டங்கள், திருவிழாக்கள் என்பவை மனித இனத்திற்கு தேவையானவையும் சமூக ரீதியில் முக்கியமான அம்சங்களுமாகும். இவை தனிமனிதர்களின் வெறுமையை போக்கவும், தனி அடையாளங்களை இழந்து சகமனிதர்களுடன் வர்க்கமாக, சமூக சக்திகளாக ஒன்றுகலக்க உதவுவதுடன், உறவுகளை, நட்புகளை சந்திக்கவும் இன்ப துன்பங்களை, கருத்துக்களை பரிமாற, வாய்ப்புக்களை உருவாக்குகின்றன.

எல்லா சமூகங்களும் தமக்கென தனியான கொண்டாட்டங்களையும் பிரத்தியேக தினங்களையும் கொண்டிராமல் இல்லை. இவற்றின் சமூக பாத்திரத்தை நாம் சரியாக புரிந்து கொள்வது அவசியமாகும். இப்போது எம்மிடையே காணப்படும் கொண்டாட்டங்கள் பெரும்பாலும் சமய கொண்டாட்டங்களாக அமைந்து விடுகின்றன. இவ்வாறான கொண்டாட்டங்களை பிற்போக்கானவையாக நாம் காண்பதனால் எம் எல்லோராலும் திறந்த மனதுடன் இக் கொண்டாட்டங்களில் கலந்து கொள்ள முடிவதில்லை. மேலும் இவ்வாறான விடயங்களில் கலந்து கொள்வதை தவிர்ப்பதால் மட்டும் இவற்றை நாம் வழக்கில் இல்லாது ஒழித்து விடலாம் என்று கூறிவிட முடியாது. இவ்வாறான கொண்டாட்டங்களுக்கு மாற்றாக முற்போக்கானதும், மதசார்பற்ற நிகழ்வுகளுடன் தொடர்புடையதுமான கொண்டாட்டங்களை புதிதாக ஏற்படுத்திக் கொள்ள நாம் முன் வரவேண்டும். இதனை நாம் செய்ய தயங்கும் போது சமூகத்தில் காணப்படும் பிற்போக்கான அம்சங்களுக்கு எதிராக காத்திரமான போராட்டங்களை முன்னெடுப்பது சாத்தியமற்றதாகி விடுகிறது. நாம் பிற்போக்கானதும் மற்றும் பகுத்தறிவிற்கு அப்பால் பட்ட கொண்டாட்டங்களில் கலந்து கொள்ளாது இருப்பதுடன் மட்டும் நின்று விடாமல் மேதினம், சர்வதேச பெண்கள் தினம் போன்றவற்றை ஊக்கமுடன் கொண்டாடுவதுடன் எமது குடும்பத்தினரையும், பிள்ளைகளையும் இவற்றில் கலந்து கொள்ள ஊக்குவிக்க வேண்டும், இல்லாத போது எமது பிள்ளைகளே நாம் கொண்டாட மறுக்கும் கொண்டாட்டங்களை சமூகத்திலிருந்து பின்பற்றிக் கொள்ளவும், பேணவும் முன்வரலாம்.

ஆகவே புதியன படைப்பதில், இந்த கொண்டாட்டங்களும் முக்கியமான பங்கைவகிப்பதாக கருதி அவற்றை கொண்டாடுவதை ஊக்கமுடன் செயற்படுத்த வேண்டும். அவற்றிற்கான சிறப்பான நிகழ்வுகளை ஏற்பாடு செய்ய வேண்டும். நண்பர்களுக்கு வாழ்த்துக்களை பறிமாறிக் கொள்ள வேண்டும். புதிய கலாச்சாரத்தை படைப்பது என்பதை நாம் அன்றாட செயற்பாடுகள் மூலமாக சிறுகச் சிறுக கட்டமைக்க முன்வர வேண்டும். பொதுவாகவே கொண்டாட்டங்கள் என்பவை சமூகத்தில் இன்னமும் முக்கியமான பாத்திரங்களையும் ஆற்றுகின்றன. நண்பர்கள், உறவினர்கள் சந்தித்து கருத்துக்களை பறிமாறி மகிழ்ச்சியான இருப்பதும், வாழ்த்துக்களை பறிமாறிக் கொள்வதும் இந்த கொண்டாட்டங்களிலேயே. குழந்தைகள் புதிய உடைகளை உடுத்துவதும், இனிய உணவுப் பண்டங்களை ஒரு கை பார்ப்பதும் இந்த நாட்களிலேயாகும். இப்படிப்பட்ட முக்கியமான ஒரு சமூக, குடும்ப கொண்டாட்டத்தை எந்தவிதமான மாற்று ஏற்பாடுகளும் இன்றி ஒழித்துவிடலாம் என நினைப்பது தவறானது அல்லவா?

புலம் பெயர்ந்த நாடுகளில் எமது குழந்ததைகள் தமது அடையாளத்தை தேட முனைகின்றனர். நாம் புதியனவற்றை உருவாக்கி அவற்றை எமது கலாச்சார வெளிப்பாடுகளாக அவர்கள் முன் அறிமுகப்படுத்த தவறும் பட்சத்தில், நாம் கைவிட எப்போதோ தீர்மானித்துவிட்ட பழைய, பிற்போக்கான கொண்டாட்டங்களை தேடியெடுத்து அவற்றை கொண்டாட வேண்டும் என்று முனைகிறார்கள். பதின்ம வயதில் ஏற்படும் அடையாளப்படுத்தல் தொடர்பான அக்கறைகளும், சக வயதினர் கொடுக்கும் அழுத்தங்களும் (Peer Pressure) ), பல்வேறு கொண்டாட்டங்களும் வர்த்தகமய படுத்தப்பட்டிருப்பதும் இவற்றிற்கான முக்கிய காரணங்களாக அமைகின்றன. இன்று சாமத்திய சடங்கு நடத்துவது என்பதில் உறுதியாக நிற்பவர்கள் ஊரிலே பிறந்து வளர்ந்த பெற்றோர்கள் மாத்திரமல்ல. இங்கு பிறந்து, வளர்ந்து, கல்வி கற்று, இங்குள்ள கலை – கலாச்சார செயற்பாடுகளினூடாக வளர்த்தெடுக்கப்பட்ட சிறுமிகளும் தான். மாற்று சமுதாயத்தை கட்ட விழையும் நாம் எவற்றையெல்லாம் வெற்றிடமான விட்டுச் செல்கிறோமோ அவற்றையெல்லாம் சமூகத்தில் உள்ள படுபிற்போக்கான அம்சங்கள் நிரப்பத் தலைப்படுகின்றன. இது ஏன் நடைபெறுகிறது? பதில் இலகுவானதுதான். இயற்கையை போலவே சமூகமும் வெற்றிடத்தை அனுமதிப்பதில்லை. அந்த வெற்றிடத்தை நிரப்புவதற்கு தேவைப்படும் புதிய அம்சங்கள் உருவாக்கப்படவில்லையானால், பிற்போக்குத்தனமான கொண்டாட்டங்களால் இந்த வெற்றிடமானது இட்டு நிரப்பப்படுகிறது.

சித்தாந்தம் என்பது வெறுமனே நம்பிக்கைகள், கருத்துக்கள் மற்றும் விழுமியங்களின் தொகுப்பு மாத்திரமல்ல. சித்தாந்தத்திற்கு ஒரு ‘பொருள்வகை ‘ வெளிப்பாடும் இருக்கிறது. சித்தாந்தம் என்பது சடங்குகள், கொண்டாட்டங்கள் மற்றும் பல்வேறு நடைமுறைகளையும் உள்ளடக்கியதே. மாற்றான முற்போக்கு, ஜனநாயக, புரட்சிகர சித்தாந்தங்களை கட்டமைக்க முனைபவர்கள், தமது முயற்சிகளை வெறுமனே கருத்துக்களின் தளங்களில் மாத்திரம் மட்டுப்படுத்திக் கொள்வதனால் அவர்கள் அடைய விரும்பும் சித்தாந்த மேலாண்மையை அடைய முடியாது. மாற்றை படைப்பதற்காக கருத்துக்களின் தளத்தில் நாம் மேற்கொள்ளும் எமது முயற்சிகளானவை, நடைமுறை மட்டத்திலும் – மாற்றான கொண்டாட்டங்கள், சடங்குகள், நிகழ்வுகள் போன்றவற்றை ஒழுங்கமைப்பதன் மூலமாகவும் பலப்படுத்தப்பட வேண்டும். இல்லாதபோது, நாம் வரித்துக் கொண்ட கொள்கைகளுக்கும், எமது வாழ்க்கை முறைகளுக்கும் இடையில் திட்டவட்டமான ஒரு இடைவெளி காணப்படுவது தவிர்க்க முடியாததாக இருக்கும். இந்த இடைவெளிதான், அந்திய சித்தாந்தங்கள் வேரை ஊன்றுவதற்கான இடைவெளியை வழங்குகின்றன.

ஒருவரது சித்தாந்தத்திற்கும், அவரது ‘தன்னிலை’ (Subject) இடையிலான உறவென்பது மிகவும் சிக்கலானது. ஒருவிதத்தில் எமது சித்தாந்தங்களே எமது ‘தன்னிலை’களை கட்டமைக்கின்றன. மனிதருக்கும், அவர் தொடர்பு கொள்ளும் புறநிலை மற்றும் சமூகத்திற்கும் இடையிலான உறவென்பது மிகவும், நேரடியானதும், எளிமையானதுமல்ல. இந்த அர்த்தத்தில் அனுபவமானது நேரடியாக அறிவைத் தந்துவிடுவதில்லை. அறிவைப் பெறுவது அத்தனை இலகுவான, நேரடியான செயற்பாடாக இருப்பின் விஞ்ஞானிகளுக்கு தேவை இருக்கமாட்டாது அல்லவா? ஒவ்வொரு மனிதரும் சித்தாந்தத்தின் ஊடாகவே புற உலகுடன் தொடர்பு கொள்கிறார். இதனை இடையீட்டுச் செயற்பாட்டு ( Mediation ) என்பர். இந்த சிக்கலான உறவை மிகவும் எளிமைப்படுத்தி, இந்த கொண்டாட்டங்கள், மற்றும் அதனுடன் தொடர்புடைய நடைமுறைகளை நாம் முற்றாக நிராகரிக்க முனையும் போது நாம் மாற்றீடு செய்ய விரும்பும் சித்தாந்தமானது முறியடிக்கப்பட முடியாததாக நின்று நிலைப்பது தவிர்க்க முடியாததாகிவிடும். ஆகவே புதிய கலாச்சாரத்தை உருவாக்க முனைபவர்கள் இந்த சிக்கலான உறவுகளை புரிந்து கொண்டு, மாற்றான, கொண்டாட்டங்கள், நடைமுறைகள் போன்றவற்றை உருவாக்கிக் கொள்ள முனைப்பாக செயற்பட வேண்டும்.

ஒவ்வொரு தனிமனிதரது வாழ்விலும் நடைபெறும் முக்கியமான காலகட்ட மாற்றங்களை, வளர்ச்சியின் பருவ மாற்றங்களை குறிக்க சடங்குகள் இருப்பது உலகலாவிய நடைமுறையாகும். பிறப்பு, திருமணம், இறப்பு போன்றவை இவற்றுள் மிகவும் அடிப்படையானவையாகும். இப்படியாக வாழ்க்கையில் ஏற்படும் முக்கியமான கட்ட மாற்றங்கள், அதனுடன் கூடவே புதிய பொறுப்புக்களையும் கொண்டு வந்து விடுகிறது. இந்த உணர்வானது சம்பந்தப்பட்டவர்களது மனங்களில் ஆழமாக பதிவது, தாம் ஏற்றுக் கொள்ளும் புதிய பொறுப்புக்களை சரிவர மேற்கொள்ள மிகவும் அத்தியாவசியமானதாகும். இதனையே இவை தொடர்பான சடங்குகள் செய்ய முனைகின்றன. எமது சமுதாயத்தில் இந்த சடங்குகள் என்பவை முற்றிலும் மதம் சார்ந்தவையாகவும், தீட்டு – தூய்மை போன்ற பிற்போக்கு கருத்துக்கள் மற்றும் சாதிய நடைமுகள் போன்றவற்றுடன் நெருக்கமாக தொடர்புடையனவாக இருக்கின்றன. அவை தவிர முன்பொரு சிறிய குலமரபு ( Tribal) சமூகத்தில் தேவையாக இருந்த சில சடங்குகள், அவற்றின் தேவைக்கான காலகட்டத்தை கடந்துவிட்ட பின்னரும், இன்றைய நவீன சமுதாயத்தில், அதன் சமூக பாத்திரம் அனைத்தையும் இழந்த பின்னரும் வெறுமனே தேவையற்ற ஆடம்பரங்களாகவும், பிற்போக்கு கருத்துக்களுக்கு எண்ணையூற்றுவதாகவும் மட்டுமே செயற்படுகின்றன. இப்படிப்பட்டவற்றிற்கு எதிராக நாம் தீவிரமாக போராடியே ஆக வேண்டியுள்ளது. ஆனால் இந்த பிற்போக்கான சடங்குகள் மற்றும் திருவிழாக்களுக்கு மாற்றான புதிதான மதசார்பற்ற, முற்போக்கு, ஜனநாயக விழுமியங்களை பரப்பக் கூடிய கொண்டாட்டங்கள்; மற்றும் விழாக்களை உருவாக்காமல், அந்த புதிய விழாக்களில் நாம் பெருமிதத்துடனும், மகிழ்ச்சியுடனும் கொண்டாடும் நிலைமைகளை உருவாக்காமல் இந்த பிற்போக்கு கொண்டாட்டங்களை ஒழித்துவிட முடியாது. இப்படியாக புதிய விழாக்கள், கொண்டாட்டங்கள்; நடைபெறும் குடும்பங்களில் குழந்தைகளும் சிறுவயது முதவே இவை தொடர்பான கலந்துரையாடல்களின் ஊடாக வளர்க்கப்படுகையில் இவற்றை அவர்கள் தமது அடையாளப்படுத்தலின் ஒரு கூறாக இந்த புதிய விழாக்களை இயல்பாகவே ஏற்றுக் கொள்வார்கள்.

புரட்சிகர, முற்போக்கு, ஜனநாயக சக்திகள் என்ற வகையில் நாம் இந்த நாட்களை மிகவும் உற்சாகமாகவும், முடியுமானபோது அந்தந்த நாடுகளில் உள்ள பிரதான முற்போக்கு அணிகளுடனும் சேர்ந்தும் கொண்டாட வேண்டும். இந்த வகையான கொண்டாட்டங்கள் எமது பொறுப்புணர்வுகளை அதிகரிப்பதாக அமைய வேண்டும். எம்மை நாமே புதுப்பித்துக் கொள்வதாக, எமது உணர்வுகளை முனைப்பாக்கிக் கொள்ள, கூட்டான செயற்பாடுகளை முன்னெடுக்க பயன்படுத்திக் கொள்ள வேண்டும். நாம் இன்று அனுபவிக்கும் பல உரிமைகளுக்கு பின்னாலுள்ள முன்னைய தலைமுறைகளினது தியாகங்களை மதிக்கவும், நாம் எதிர் கொள்ளும் புதிய சவால்களை முறியடிப்பதற்கு திட சங்கற்பம் ஏற்கவும் இந்த விழாக்களை நாம் பயன்படுத்திக் கொள்ள வேண்டும். இப்படி செய்வோமானால், இதற்கு மேல் இந்த தினங்கள் வெறுமனே சம்பிரதாயபூர்வமானவை என்ற நிலைமையைத் தாண்டி எமது போர்ப்பிரகடனங்களாக ஒலிக்கத் தொடங்கும். ஊர்வலங்களை ஒழுங்கு செய்வோம். அதில் நிறையவே சத்தம் செய்வோம். எமது உடைகளும், கொடிகளும், பதாகைகளும் எங்கும் உற்சாகத்தை ஊற்றெடுக்கச் செய்யட்டும். எமது உற்சாகம் அருகில் இருப்பவர்களையும், எமது சுற்றத்தினரையும் தொற்றிக் கொள்ளுமாறு செய்வோம்.

நீண்ட காலமாக தமிழர் மத்தியில் இப்படிப்பட்ட பாரம்பரியங்களை முறையாக செய்யாமல் இருந்துவிட்டு, இப்போது தொடங்குவது ஆரம்பத்தில் பெரிய அளவில் பயன்களைத் தராமல் போகலாம். ஆனால் அடுத்தடுத்த தடவைகளில் இது சிறிது சிறிதாக பெருத்து இவற்றை எமது சமூகத்தின் புதிய நியமங்களாக மாற்றவதற்கு நாம் ஓயாமல் உழைக்க வேண்டும்.

உசாத்துணை நூல் : Casting Perls, The Women’s Franchise Movement in Sri Lanka- Malathi de Alwis & Kumari Jayawardena

தகவல் : http://www.penniyam.com/2010/03/blog-post_5737.ஹ்த்ம்ல்

அனைத்துலக பெண்கள் தினம் - 2010

2010-03-03T20:31:00.000-08:00

ஒவ்வொரு ஆண்டும், மார்ச் 3 -ஆம் திகதி அனைத்துலக பெண்கள் தினம் மிக விமரிசையாக உலகளவில் கொண்டாடப்பட்டு வருகிறது. பொருளாதாரம், அரசியல் மற்றும் சமூகவியல் ஆகியவற்றில் பெண்களின் உயர்வை அல்லது அடைவுநிலையை நினைவு கூறும் பொருட்டு இந்த தினமானது கொண்டாடப்பட்டு வருகிறது.

1975 ஆண்டு தொடங்கப்பட்ட இந்த தினத்தின் கரு ஒவ்வொரு ஆண்டும் மாறுபடும். ஒரு குறிப்பிட்ட கருவை மட்டும் சார்ந்து இல்லாமல், ஒவ்வொரு மனித / பெண்கள் உரிமை அமைப்புகள் தங்கலுக்கு விருப்பமான அல்லது சாதகமான பெண் உரிமையைப் பற்றிய விஷயங்களை கருவாக தேர்ந்து எடுக்கலாம்.

1975 - 2010 வரை உள்ள சில அனைத்துலக பெண்கள் தின கருக்கள் :

2010 - அனைவருக்கும் சம உரிமை, சம வாய்ப்புகள்
2009 - ஆண்களும் பெண்களும் ஒன்றிணைந்து பெண்கள் வன்முறையை ஒழிப்போம்
2008 - பெண்களிடம் முதலீடுங்கள்
2007 - பெண்கள் வன்முறை ஒழிப்போம்
2006 - முடிவெடுப்பதில் பெண்கள்
2005 - பெண்களுக்கான சம உரிமை : பாதுகாப்பான எதிகாலத்தை அமைத்தல்.
2004 - பெண்களும் எ.ஐ. வியும்
2003 - பெண்களின் சம உரிமையும், மில்லினியம் முன்னேற்ற கோல்களும்
2002 - இன்றைய ஆப்கானிஸ்தான் பெண்கள் : உண்மைகளும், வாய்ப்புகளும்
2001 - பெண்களும் அமைதியும் : பெண்கள் பிரச்சனைகளுக்கு தீர்வு காணுதல்
2000 - அமைதிக்காக பெண்கள் ஒன்றுபடுதல்
1999 - வன்முறையிலிருந்து பெண்களுக்கு விடுதலை
1998 - பெண்களும் மனித உரிமையும்
1997 - அமைதியில் பெண்கள்
1996 - முடிந்ததை கொண்டாடி, எதிர்காலத்தை திட்டமிடு
1975 - யுன் கொண்டாடிய முதலாவது அனைத்துலக பெண்கள் தினம்

கற்பழிப்பு அது உங்களின் தவறு அல்ல !!! - பகுதி 2

2010-02-28T23:09:00.000-08:00

கற்பழிப்பு என்பது ....

கற்பழிப்பு சம்பவங்கள் வாலிபப் பருவ பெண்களிடத்தில் தான்நடைபெறுகின்றன என சொல்லமுடியாது. ஏனெனில் வயது கடந்தபெண்களிடத்திலும் கூட இந்த கற்பழிப்புசம்பவங்கள் நடந்திருக்கின்றன.

கற்பழிப்பு இரவு நேரங்களிலும், தனிமையான, மறைப்புறமான இடங்களில் தான் நடைபெறும் என்று சொல்வதற்கில்லை. கற்பழிப்பு எந்த இடத்திலும், எந்த நேரத்திலும் கூட நிகழலாம். பாதுபாப்பான இடங்களான வீடு, பள்ளிக்கூடம், வேலை இடம் என கற்பழிப்பு எவ்விடத்திலும் நடக்கலாம். கற்பழிப்பிற்கு நேரம், இடம் என ஒரு வரையறை இல்லை.

ஒரு வேளை நீங்கள் கற்பழிக்கப்பட்டிருந்தால் .........

உங்களது உடலை சுத்தம் செய்யாதீர்கள் / உடைகளை மாற்றாதீர்கள்.

உங்கள் முதல் கட்ட நடவடிக்கை உங்களை சுத்தம் செய்வதாய் தான் இருக்கும். ஆனால், அதைக் காட்டிலும் முக்கியம் என்னவென்றால் மருத்துவரிடம் சென்று பரிசோதிப்பதே. இரத்தக்கறைகள், விந்துகள், நூல், தலை முடி போன்றவை யாவும் கற்பழிப்பை நிரூபிக்கும் முக்கிய ஆதாரங்களாகும்

ஒரு நண்பரிடம் சொல்லுங்கள்

உங்களை மருத்துவமனைக்கும், காவல் நிலையத்திற்கும் அழைத்து செல்லுமாறு அந்த நண்பரைக் கேளுங்கள். நடந்த சம்பவத்தை நினைவுக் கூறும் போதும், அவற்றை விவரிக்கும் போதும் ஒரு வித மன உளைச்சலுக்கு உள்ளாகவும் நேரிடும்.

உடனடியாக மருத்துவமனைக்கு சென்று பரிசோதனை செய்துக் கொள்ளுங்கள்.

மருத்துவமனை ஊழியர்கள் நடந்த சம்பவத்தை போலீசாரிடம் முறையிடக்கூடும். சில சமயங்களில் காவல் துறையினரின் குற்ற அறிக்கைகள் மருத்துவமனைகளிலும் பதிவு செய்யப்படலாம் அல்லது நீங்கள் நேரடியாகவே காவல் நிலையத்திற்கு செல்லலாம். பின்னர் நீங்கள் மருத்துவமனைக்கு போகும் போது, ஒரு பெண் காவல் அதிகாரி உங்களுடன் துணைக்கு வருவார்.

மருத்துவமனையில் ....

உங்களை மருத்துவர்கள் பரிசோதிப்பதற்கு முன்னதாக, ஒரு அனுமதி படிவம் உங்களிடம் கொடுக்கப்படும். கிடைக்கப் பெற்ற விபரங்கள் காவல் துறையினரின் புலன் விசாரணைக்காக எடுத்துக் கொள்ளப்படும். மருத்துவர் உங்களின் அந்தரங்க இடங்களைப் பரிசோதிப்பார். உங்களது ஆடைகளும் சோதனைக்கு உட்படும்.

காவல் துறையினரின் புலன் விசாரணை ..

காவல் துறையினரின் முதல் கற்பழிப்பு முறையீட்டுக்குப் பின், ஒரு பெண் காவல் அதிகாரி ( புலன் விசாரணைப் பிரிவு ) உங்களது சம்பவத்தை விசாரிப்பார். எல்லா விபரங்களும் சேகரிக்கப்படும். நீங்கள் சில வேளைகளில் குற்றவாளியை அடையாளங்காண காவல் நிலையத்திற்கு அழைக்கப்படலாம்.

காவல் துறையினரின் புலன் விசாரணைக்குப் பிறகு ...

அரசாங்கத் தரப்பு வழக்குரைஞர் ஒருவர் உங்கள முறையீட்டை விசாரிப்பர். கிடைக்கப் பெற்ற ஆதாரங்களின் மூலம் விசாரணை மேற்கொள்ளப்படும். ஆதாரங்கள் உறுதிப்படுத்தப்படாத பட்சத்தில் அவரால் எந்ததொரு குற்றச்சாட்டையும் வெளியிட முடியாது.

நீதிமன்றத்தில்..

நீங்கள் முறையீடு செய்தவராகையால் நீதிமன்றத்தில் தகுந்த ஆதாரங்களோடு சாட்சிக் கொடுக்க அழைக்கபடுவீர்கள். உங்களுக்கு ஒரு வழக்குரைஞர் தேவைப்பட மாட்டார். ஆனாலும் வழக்கிற்கு முன்னும், வழக்கு நடந்துக் கொண்டிருக்கும் போதும் உங்களது சாட்சிக்குஉறுதுணையாக ஒரு வழக்குரைஞர் ஏற்படுத்தப்படுவார். நீங்கள் கற்பழிப்பு குறித்தான ஆதாரங்களை வெளியிடும் போது, ஒரு வேளை நிதிமன்ற அவையிலுள்ள பொதுமக்களை வெளியேற்றக் கூடும்.

கற்பழிப்புக் குற்றத்திற்கான தண்டனைகள் :

பேனல் கோர்ட், செகஷன் 376- படி கற்பழிப்பு பேரில் குற்றம் சாட்டப்பட்டவர்கள் குறைந்த பட்ச தண்டனையாக ஐந்து வருடங்களுக்கு குறையாமலும், கூடுதல் பட்சமாக இருபது வருடங்களுக்கு மேற்போகாமலும் மற்றும் சவுக்கடிகளையும் பெறுவார்.

குறிப்பு :

மலேசியர்களின் திருமணம் நடந்து முடிந்த பிறகு இல்லற வாழ்க்கையில் கற்பழிப்பு சம்பவம் நடந்தால் நடவடிக்கை எடுக்க மலேசிய சட்டத்திட்டத்தில் அரசாங்கம் அமுலாக்கவில்லை.

நீங்கள் கற்பழிக்கப்பட்டிருப்பின் கோபம், வேதனை, கலக்கம், குழப்பம், குற்றவுணர்வு, வெட்கம் போன்றவற்றால் ஆட்கொள்ளப்பட்டிருப்பீர்கள். தனித்தும், மற்றவர்கள் இடத்தே சேராமலும் இருப்பீர்கள். இவை வழக்கமாக ஏற்படக் கூடியவை.

நினைவில் கொள்ளுங்கள் ! கற்பழிப்பு உங்களுக்கெதிரான ஒரு குற்றம். அது உங்களின் தவறு அல்ல. உங்கள் உணர்வுகளைப் பகிர்ந்து கொண்டு, உங்களுக்கு வழிகாட்ட ஒரு நம்பிக்கையானவரைத் தேடுங்கள் அல்லது பெண்கள் உதவி / மறுமலர்ச்சி நிலையத்தின் உதவியை நாடுங்கள்.

தகவல் : பெண்கள் மறுமலர்ச்சி நிலையம், பினாங்கு

கற்பழிப்பு - இது உங்களின் தவறு அல்ல !!! - பகுதி 1

2010-01-12T23:10:00.000-08:00

கற்பழிப்பு என்றால் என்ன?

கற்பழிப்பு என்பது உடலுறவு சம்பந்தப்பட்ட ஒரு வன்முறை குற்றமாகும். உங்களுக்கு உடன்பாடில்லாமல், விருப்பமில்லாமல் உங்களது மர்ம உறுப்பில் ஓர் ஆண் தன்னுடைய மர்ம நுழைப்பதே கற்பழிப்பு என சட்டம் சொல்கிறது. நீங்கள் 16 வயதிற்கு உட்பட்டவர்களாயின், உங்கள் விருப்பத்தோடு அல்லது விருப்பமின்மையோடு எந்ததொரு கற்பழிப்பு சம்பவம் நிகழ்ந்தாலும் அது குற்றமே என சட்டம் சொல்கிறது.

பாலியல் வன்முறையோடு சம்பந்தப்பட்ட இதர குற்றங்கள்

மனிதத் தன்மைக்கு முரணாக ஒருவரை வற்புறுத்தி அவரது வாயில், மர்ம உறுப்பில் அல்லது ஆசன வாயில் எந்ததொரு பொருளையும் வலுக்கட்டாயமாக நுழைப்பது, உங்களை மனதளவில் அதிகமாக பாதித்தாலும், அது சட்டப்படி கற்பழிப்பு குற்றமாகாது. இம்மாதிரியான காரியங்கள் பாலியல் பலாத்காரங்கள், பண்பை மீறுதல், மனிதத் தன்மைக்கு முரணான உடலுறவு, கற்பழிப்பு முயற்சி போன்ற குற்றங்களின் கீழ்வரையறுக்கப்படலாம்.

கற்பழிப்பு என்பது .....

உடலுறவு அல்ல. அது ஒரு வன்முறை. கற்பழிக்கிறவன் தன் எண்ணம் ஈடேர கடுமையும், வன்முறையும் பயன்படுத்துவான். உடலுறவு உங்கள் சுய மரியாதையைக் குலைக்க ஓர் ஆயுதமாகப் பயன்படுத்தப்படும். உங்களை வேதனைப் படுத்தவும், சுய கௌரவத்தைக் குலைக்கவும் கோபத்தோடு கூடிய வன்முறையில் பாதிப்புக்குள்ளாக்குவதே கற்பழிப்பு எனப்படுகிறது.
இது உங்களின் தவறு அல்ல. உங்கள் விருப்பத்தின் பேரில் கற்பழிப்பு நடைபெறுவதில்லை. நீங்கள் கவர்ச்சியாக உடையணிவதும், செயல்படுவதும் உங்களை நீங்களே கற்பழிப்புக்குத் தாரை வார்க்கிறீர்கள் என்று பொருளாகாது. ஓர் ஆண் ஒருப் பெண்ணைக் கற்பழிப்பதற்கு அப்பெண்ணின் நடவடிக்கைகள் தான் வாய்ப்பும் உரிமையும் கொடுக்கின்றன என பொருள்படாது.
கற்பழிப்பு தெரியாத அறியப்படாத நபரால் தான் நடைபெறுகிறது என்று சொல்ல முடியாது. பாதிக்கப்பட்ட பெண்களில் பலர் தங்களை கற்பழித்தவனை நன்கு அறிந்திருக்கின்றனர். கற்பழிப்பவன் உங்கள் நண்பராக, அயலானாக , காதலனாக, ஏன் உங்கள் குடும்ப உறுப்பினராக அல்லது சொந்த பந்தங்களில் ஒருவனாகக் கூட இருக்கலாம்.

பத்திரிகை செய்தி 25 -11-2009

2010-01-11T21:42:00.000-08:00

16 நாட்கள் வன்முறையைப்பற்றி வெளிவந்த பத்திரிக்கை செய்தி

கனவான எதிர்ப்பார்ப்புகள் - பகுதி 2

2010-01-10T23:14:00.001-08:00

தான் எதிர்ப்பார்க்காத ஒன்று அங்கே நிகழப் போவதை அறியாத ரேவதியும் மற்றவர்களும் அவருடன் சென்றனர். அங்கே அவர்கள் தங்குவதற்கு ஒரு வீடு ஏற்பாடு செய்யப்பட்டிருந்தது. களைப்பாக வந்த அனைவருக்கும் உணவு பறிமாறப்பட்டது. பிறகு அவர்கள் அனைவரும் ஐந்து குழுக்களாக பிரிக்கப்பட்டு தத்தம் ஏஜண்டுகளுடன் அனுப்பப்பட்டனர். இதன் பிறகு நாம் வீட்டு வேலைக்கு அனுப்பப்படுவோம்; நன்றாக வேலை செய்து நிறைய சம்பாதிக்க வேண்டும்; பணம் சேர்த்து குடும்ப கஷ்டத்தை போக்க வேண்டும் என பல்வேறான கற்பனைகளுடன் பயணம் செய்தாள் ரேவதி. 30 நிமிட பயணத்திற்கு பிறகு, அவர்களை ஏற்றி வந்த கார் ஒரு தங்கும் விடுதியின் முன் நின்றது. அங்கே சில இளம் பெண்கள் அரைகுறை ஆடைகளை அணிந்து, மோட்டார் சைக்களில் அமர்ந்து இருக்கும் வாலிபர்களுடன் பேசிக் கொண்டிருந்தனர். சகிக்க முடியாத சில காட்சிகளும் அங்கே அரங்கேறிக் கொண்டிருந்தனர். இங்கேவா நாம் வேலை செய்ய போகிறோம் என ரேவதி யோசித்து கொண்டிருக்கும் போது " ம்ம் .. யோசித்தது போதும்; சீக்கரம் இறங்குங்கள் " என அந்த ஏஜண்டு அவசரப்படுத்தினார்.

பெண்கள் உரிமையையும் ஜனநாயகத்தையும் முன் நிறுத்துதல்

2009-11-23T00:00:00.000-08:00

இந்த உலகமயமாகும் சகாப்தத்தில் மேம்பாடு ஒரு சிலருக்கு வலுவானதொரு வருமானத்தை ஈட்டுவதில் மட்டும் கவனம் செலுத்தாமல் பரந்ததொன்றாக இருக்க வேண்டும். அதாவது , நியாயமான கொள்கைகளையும் சமத்துவமிக்க ஜனநாயகத்தையும் , பொது விவகாரங்களில் பிரஜைகள் குரல் எழுப்பும் சந்தர்ப்பத்தையும் போட்டியிடும் உரிமையையும் , பொறுப்புள்ள அரசாங்கத்தைத் தேர்வு செய்யவும் கண்காணிக்கவும் சுதந்திரம் வழங்க வேண்டும்.

பெண்கள் மனித உரிமைத் திட்டம்

உலக மக்கள் தொகையில் பாதி பெண்களாவர். இருந்தும் இவர்களின் உரிமைகள் பொதுவாக கவனிக்கப்படாமல் பலமுறை வரையறுக்கப்பட்டுள்ளன. சமத்துவம் என்பது ஆண்களுக்குள்ள அதே உரிமைகள் தான் என கற்பனை செய்யப்படுகின்றன . இது அடிக்கடி சமத்துவமில்லாத பாதகமான நடைமுறைகளுக்குத் தான் இட்டு செல்கின்றன. உடல் அமைப்பு வித்தியாசங்களாலும் , பொறுப்புகளாலும் பெண்கள் அந்தஸ்து குறித்த ஒரு தலை பட்சமான கருத்துக்களாலும் , பொறுப்புகளாலும் , ஆண்களை விட பெண்களுக்கு மாறுபட்ட வாழ்க்கை கதைகளும் அனுபவங்களும் உள்ளன . இதனால் ஒரு பெண்கள் உரிமைத் திட்டத்திற்கான குறிப்பிட்ட தேவை உள்ளது .

பெண்களுக்கெதிரான அனைத்து விதமான பாதகங்களையும் களைவது மீதான ஒப்பந்தம் இந்த ஒப்பந்தம் பெண்களின் உரிமைகளுக்கான ஒரு விரிவான திட்டத்தை வழங்கியுள்ளது .

சரத்து 1 இன் படி பாதகங்கள் என்பது :-

.வேண்டுமென்றோ அல்லது மறைமுகமாகவோ புரியப்படுபவைகள் ; உதாரணத்திற்கு ,ஆணும் /பெண்ணும் சமம் என பாவிக்கும் சட்டங்களின் முடிவுகளையும் உள்ளடக்கும் .

.பெண்களுக்கு எதிரான எந்த ஒரு பாதக சூழ் நிலையையும் மதிப்பிடும் ஒரு முறையை வழங்குதல் .

.புதிதாகத் தோன்றும் பிரச்கனைகள் இந்த ஒப்பந்தத்தின் பகுதியில் தெளிவாக குறிப்பிட வில்லை .(உதாரணம் ,பெண்களுக்கு எதிரான வன்முறைகள் )

சமத்துவத்தை உறுதிப் படுத்தும் குறிப்பாக பெண்களின் உரிமைகளைப் பாதுக்காக்கும் சாதகமான சட்டங்களையும் கொள்கைகளையும் அமுலுக்குக் கொண்டுவரும் பொறுப்பு அரசாங்கத்தினுடையது என இந்த ஒப்பந்தத்தின் அடிப்படை கொள்கை வலியுறுத்துகின்றது .

மலேசிய அரசாங்கம் உடன்பாடான நடவடிக்கைகளை எடுத்துள்ளது தெரிந்ததாகும் . அவற்றில் இவைகள் இணைக்கப்பட்டுள்ளன :

.1989 இல் ஆரம்பிக்கப்பட்ட பெண்கள் மீதிலான தேசிய கொள்கைகயும் 1997 ஆம்
ஆண்டு செயல்திட்ட அமலாக்கமும்
.மகளிர் அமைச்சு ,(பிறகு மகளிர் குடும்ப மேம்பாட்டு அமைச்சு என மாற்றம் கண்டது .(தற்போது, மகளிர்,குடும்ப ,சமுக மேம்பாட்டு அமைச்சு என அழைக்கப்படுகிறது ) 2001 இல் அமைக்கபட்டது .

. 2001ல் கூட்டரசு சட்டதிட்டங்களில் சரத்து 8(2)இன் திருத்தத்தில் பாதகங்களை தடைசெய்யும் தலமாக ஆண்/பெண் சமநிலை இணைக்கப்பட்டுள்ளது .

இருப்பினும் பாதகமான சட்டங்கள் தொடர்ந்து அமுலில் உள்ளன .அதோடு வழக்கமான சமத்துவம் அளித்தலுக்கும் பெண்கள் அனுபவிக்கும் உண்மையான உரிமைகளுக்கும் இடையே இடைவெளிகளும் உள்ளன .

பிரச்சனைகள்

.பொதுவாக ,தீவிரவாத செயல்கள் என்னற்ற அடக்குமுறைச் சட்டங்களால் அடக்கப்படுகின்றன .இவை அடிப்படை உரிமை வாழ்வைத் தடை செய்கிறது . உள்நாட்டு பாதுகாப்புச் சட்டம் ,அச்சக பிரசுர சட்டம் ,பொது ஒழுங்கும் அவசர கால சட்டமும் இவற்றில் அடங்கும் .

.கூட்டரசு அரசியல் சாசனம் திருத்தப்பட்டிறுப்பினும் முரண்பாடாகவும் பகிரங்கமாகவும் பெண்களுக்கெதிரான பாதகங்கள் இன்னும் நடைப்பெறுகின்றன. உதாரணத்திற்கு பகுதி 3 , சரத்து 15(1) ஒரு மலேசிய ஆண்மகன் ஒரு வெளிநாட்டு பெண்ணை மணந்து கொண்டால் அவன் மகன் மலேசியாவுக்கு வெளியே பிறந்தாலும் கூட தன் நட்டு பிரஜையாக முடியும் என குறிப்பிட்டுள்ளது .ஆனால் பெண்களுக்கு இந்த உரிமை மறுக்கப்பட்டுள்ளது .

.இஸ்லாமிய குடும்ப சட்டம் (கூட்டரசு பிரதேசம் ) (திருத்தம் ) 2005ம் ஆண்டு நாடாளுமன்றத்தால் நிறைவேற்றப்பட்டது .மசோதாவில் பாதகமான திருத்தங்கள் உள்ளன .பகுதி 23(3) லும் 24(4) (௮ )விழும் ஆண்கள் எளிதாக பலதரங்களை கொண்டிருக்க உதவுகின்றன .பகுதி 23 (9) (௮ ) ஒரு கணவன் பலதார திருமணம் செய்துகொள்ளும்போது ஒரு மாணவி ஜீவனாம்சம் பெறுவதையோ அல்லது சொத்து பிரிப்பதையோ தேர்வு செய்ய வற்புறுத்தப்படுகிறாள் .

.வழக்குமன்றத்தின் இரட்டை சட்டப்பூர்வ முறை சொந்த விசயங்களில் முஸ்லிம்களுக்கும் முஸ்லீம் அல்லதவர்கலுக்குமிடையே வேறுப்படுகின்றன.ஒரு வாழ்க்கைத்துணை மதம் மாறிய சூழ்நிலையில் பிள்ளைகள் பராமரிப்பு ,மதம் சொத்துரிமை பாதிக்கப்படுகின்றன .

.பெண்களுக்கெதிரான வன்முறைகளிலிருந்து பாதுக்கக்கும் சட்டங்கள் குறிப்பாக பலாத்காரம் ,வீட்டு வன்முறைகள் ,பாலியல் தொல்லைகள் போன்ற விவகாரங்களில் தொடர்ந்து அதிருப்தியளிக்கின்றன

.பொது சேவையில் முடிவெடுக்கும் பதவிகளில் உள்ள பெண்களின் எண்ணிக்கை அரசாங்கத்தின் இலக்கான குறைந்த பட்ச 30%க்கும் குறைவாகவேயுள்ளது

மலேசிய அரசாங்கத்தின் கடமை
பெண்களின் உரிமைகளை சக்தி வாய்ந்த அமலாக்கத்திர்க்குத் தடையாக இல்லாமல் சாதகமான ஒரு சூழ்நிலையை உருவாக்க வேண்டுகோள் விடுக்கின்றது .மலேசிய அரசாங்கம் ,நாடாளுமன்ற உறுப்பினர்கள் ,செனட்டர்கள் இந்த முக்கிய விவகாரங்களில் பங்காற்ற முடியும் .

.கொள்கை அளவிலும் செயலாக்கத்திலும் பெண்கள் உரிமைகளுக்கும் ஜனநாயகத்திற்கும் ஒத்துழைத்தல் .

.இந்த பிரச்சனைகளையும் பரிந்துரைகளையும் தங்களது தேர்தல் அறிக்கையிலும் தொகுதி நிகழ்ச்சிகளிலும் இணைதல்

.பெண்கள் உரிமைகள் அமலாக்கத்திலும் ஜனநாயக செயலாக்கத்திலும் மேம்பாட்டையும் இடைவெளிகளையும் கண்காணித்தல்.

16 நாட்கள் பெண்கள் வன்முறையை எதிர்ப்போம் பிரச்சாரம்

2009-11-22T23:49:00.000-08:00

பிரச்சாரத்தின் அறிமுகம்

16 நாட்கள் பெண்கள் வன்முறையை எதிர்ப்போம் என்பது உலகளவில் நடத்தப்பட்டு வரும் பிரச்சாரமாகும். இந்தப் பிரச்சாரமானது 1991- ஆம் ஆண்டு அனைத்துலக பெண்கள் தலைமை மையத்தினால் தொடங்கப்பட்டது. இந்தப் பிரச்சாரம் நவம்பர் 25 - அனைத்துலக பெண்கள் வன்முறையை எதிர்ப்பு தினத்திலிருந்து டிசம்பர் 10 - அனைத்துலக மனித உரிமை தினம் வரை கொண்டாடப்படும். பெண்கள் வன்முறை மனித உரிமைகளில் ஒன்று என்பதையும், பெண்களின் உரிமை பறிக்கப்பட்டால் அது மனித உரிமையைப் பறிப்பதற்கு சமம் என்பதையும் இந்தப் பிரச்சாரம் பிரதிப்பலிக்கிறது.

பிரச்சாரத்தின் நோக்கம்

வரும் காலத்தில் பெண்கள் வாழ்வதற்கு பாதுகாப்பான சூழ்நிலை வேண்டியதின் அவசியத்தைப் பற்றி மக்களுக்கும் பெண்களுக்கும் விழிப்புணர்ச்சி ஏற்படுத்த வேண்டும் என்ற நோக்கத்தில்தான் இந்தப் பிரச்சாரம் மேற்கொள்ளப்படுகிறது. தற்போதைய காலக்கட்டத்தில் பெண்கள் பல்வேறான வன்முறைகளை தங்களின் வாழ்நாட்களில் எதிர்நோக்கி வருகின்றனர். ஆகையால், அவர்கள் நன்றாக வாழ்வதற்கும், பாதுகாப்பாக வேலை செய்வதற்கும், வாழ்க்கையில் உயர்வதற்கும் பாதுகாப்பான சூழ்நிலை மிகவும் அவசியம். எனவே, மக்கள் அனைவரும் தங்கள் அம்மா, அக்காள், தங்கை மற்றும் மகள்களுக்கு பாதுகாப்பான சூழ்நிலை அமைவதை உறுதி செய்ய வேண்டும்.

பெண்களும் தொழிலும்

2009-11-22T18:31:00.000-08:00

கடந்த 40 ஆண்டுகளுக்கு மேலாக, மலேசிய பெண்கள் தாங்கள் ஈடுபட்டுள்ள தொழில் துறையில் சில முன்னேற்றங்களைக் கண்டுள்ளனர்.எனினும், இது ஊதியமளிக்கும் தொழில்களில் மட்டும்தான் காணப்படுகிறது.ஆனால்,அவர்கள் செய்யும் ஊதியமில்லா தொழில்களில் [உதாரணம் :வீட்டுவேலைகள்,குழந்தைகள் வளர்ப்பு ] தொடர்ந்து அங்கிகரிக்க படாமலேயே உள்ளனர்.

கலாச்சார,மத நம்பிக்கைகள்,அரசியல் ஆர்வமின்மையும் வாய்ப்புகளும் ஆண் பெண் தொழில் சூழ்நிலைகளில் வேறுபாடுகளை உருவாக்கி வருகின்றன.
2003 ல் மலேசிய தொழில் சக்தியில் பெண்கள் 47.7% [மகளிர் குடும்ப அமைப்பு மற்றும்
சமுக மேம்பாட்டு 2004 புள்ளிவிபரப்படி ]
எனினும்,இவர்கள் பெரும்பாலும் குறைந்த திறமையும் அதிக உழைப்பும் உள்ள நிறுவனங்களில் பணிக்கமர்தப்பட்டுள்ளனர்.உதாரணதத்திற்கு கடைகள் சந்தைகளிலுள்ள விற்பனை ஊழியர்கள் [17.4%]இயந்திரங்களை இயக்குபவர்களும் பொறுத்துபவர்களும் [12.1%] ஆரம்ப நிலைத் தொழிலாளர்களும் [11.9%] அதோடு முறைப்படியில்லாத துறைகளிலும். [மகளிர் ,குடும்ப ,சமூக மேம்பாட்டு அமைச்சின் 2004 புள்ளிவிபரப்படி ]
அதிகப் பெண்கள் மேலதிகார நிர்வாகப் பதவிகளில் இருந்தாலும் கூட ஆண்கள் எண்ணிக்கைதான் அதிகம் உள்ளது . 6.4% பெண்கள்தான் உயர்பதவியில் உள்ளனர். [மகளிர்,குடும்ப அமைச்சு ,சமூக மேம்பாட்டு அமைச்சின் 2004 புள்ளிவிவரப்படி ]
குழந்தை வளர்ப்பும் பராமரிப்பும் தொடர்ந்து பெண்களின் முக்கிய பொறுப்பாகவே உள்ளன .

முக்கிய பிரச்சனைகள்

தொழில் இடங்களில் பாரபட்சம்

சில தனியார் நிறுவனங்களில் பெண்கள் ஆண்களை விட விரைவாக ஓய்வு பெற வற்புறுத்தப்படுகின்றனர்.
பெண் தொழிலாளிகள் ,சட்ட பாதுகாப்புக் குறைவினால் இன்னும்பாலியல்பலாகாரத்திற்கு ஆளாகின்றனர்.

இனப்பெருக்கத் தொழில்

ஆண்களுடன் ஒப்பிடும்போது இருமடங்கு பெண்கள் வீட்டு வேலைகளை கவனிக்கின்றனர்.இவ்வேலைக்கு ஊதியம் வழங்கப்படுவதில்லை.30 வயதாகும் போது 16 % பெண்கள்,திருமணம் மற்றும் குடும்பக் காரணாங்களினாலும் வேலைக்கு செல்வதில்லை.
குழந்தை பிறப்புக்குப் பின்,தரமிக்க குழந்தைகள் பராமரிப்பு வசதிகள் குறைவினால் பெண்கள் தொடர்ந்து வேலை செய்யவோ அல்லது மீண்டும் தொழிலுக்கு செல்லவோ கஷ்டாமாக உள்ளது.

உலகமயமாகுதலின் தாக்கம் :தொழில் பாதுகாப்பின்மை

குத்தகைத் தொழில் அதிகரிப்பு :நிரந்தரத் தொழிலில் கிடைக்கும் சலுகைகளும் பாதுகாப்பும் கிடையாது.
அதிகப் பெண்கள் தேவைப்படும்போது மட்டும் வேலைக்கும் எடுத்துக் கொள்ளப்படுவதால் முழுமையான சலுகைகளுக்கு தகுதி பெறுவதில்லை.உதாரணம் : மருத்துவ விடுமுறையும் வருட விடுமுறையும்.
நாள் சம்பள தொழிலின் காரணமாக எளிதில் பாதிப்புக்குள்ளாகும் தொழிலாளர்கள் ஒரு குழுவாக உள்ளனர். [உதாரணம் : தோட்டத் தொழிலாளர்களும் வெளிநாட்டுத் தொழிலாளர்களும். ]

அமைப்புகளை உருவாக்கும் உரிமை

அதிகமான பெண்கள் வரி விலக்கு பெற்ற தொழில்பேட்டைகளில் பணிபுரிகின்றனர். இங்கு தொழிற்சங்கங்கள் அனுமதிக்கபடுவதில்லை.
மிகக் குறைவான பெண்கள் தொழிற்சங்கத்தலைமைப் பதவிகளில் அங்கம் வகிப்பதால் இவர்களின் விஷேசத் தேவைகள் கருத்தில் கொள்ளபடுவதில்லை.
தொழிற்சங்கவாதிகள் குறைந்தபட்ச சம்பளம் ரிங்கிட் மலேசியா 900 க்குப் போராடினாலும் சில கூட்டு ஒப்பந்தங்களில் இன்னும் ரிங்கிட் மலேசியா 360 க்கும் ரிங்கிட் மலேசியா 500 க்கும் இடையிலான சம்பளத்தையே நிர்ணயித்துள்ளனர்.
தொழில் சட்டங்கள் தொழிலாளர்கள் ஒன்று கூடி அவர்களின் தொழில் சூழ்நிலைகளை சீர்திருத்தம் செய்யும் உரிமையை ஒதுக்கி வைத்துள்ளன .

உங்களால் என்ன செய்ய முடியும் ?

உங்கள் இடத்திலுள்ள நாடாளுமன்ற அல்லது சட்டமன்ற பிரதிநிதியை நேரில் கண்டு அல்லது கடிதம் வாயிலாக உங்களின் தேவைகளைத் தெரிவியுங்கள் .
மகளிர் , குடும்ப சமூக மேம்பாட்டு அமைச்சுக்கு மற்றும் மனித வள அமைச்சுகளுக்கு கடித வாயிலாக உங்கள் கருத்துகளை எடுத்துரைக்கவும்
குழுக்கள் அமைத்து உங்களது தேவைகளைப் பற்றி விவாதியுங்கள் அல்லது அரசாங்க சார்பற்ற அமைப்புகளின் பிரச்சாரங்களில் பங்கு கொள்ளுங்கள் .

கீழ்காண்பவைகளை செய்யும்படி அவர்களை துரிதப்படுத்தவும்

தொழில் இடங்களில் பாரபட்சம் .

முறைப்படியில்லாத துறையையும் சேர்த்து பெண்களின் தொழிலில் ஏற்படும் மாற்றங்களின் வகைகளை ஆராய்ந்து வெளியிடுதல்.
பாலியல் பலாத்கார சட்டம் இயற்றுதல் .
ஆண்களும் பெண்களும் ஒரே வயதில் ஓய்வு பெறும் விருப்புரிமை அளித்தல்.
குறைந்தபட்ச சம்பளம் ,தொழில் பாதுகாப்பு , சமூக பாதுகாப்பு , ஆட்குறைப்பு / வேலையின்மை இன்சுரன்ஸ் குறித்த தொழில் சட்டத்தை மறு ஆய்வு செய்து திருத்துதல் . [சபா,சரவாக் உட்பட ]

இனப்பெருக்கத் தொழில்

தரமான குழந்தை பராமரிப்பு வசதிகளை தொழில் இடங்களிலும் / சமூகங்களிலும் வழங்குதல் .
ஆண்களும் வீட்டு வேலைகளைப் பகிர்ந்துக் கொள்ள ஊக்குவித்தல் .பள்ளிப் பாடத்திட்டதிலுள்ள ஆணுக்கு என்று பெண்ணுக்கு என்று ஒதுக்கப்பட்டுள்ள ஒரே மாதிரியான வேலை பணியை நீக்குதல் .செய்திசாதனங்களில் ஆணையும் / பெண்ணையும் பாலியல் கருவிகளாக காட்டப்படுவதையும் தவிர்த்தல் .

உலகமயமாதலின் தாக்கம்

பெண்கள் பயிற்சி பெறவும் திறமைகளை வளர்க்கவும் வாய்ப்பளிப்பதையும் சேர்த்து தொழில் செய்ய உரிமை அளிக்கும் ஒரு தேசிய தொழில் கொள்கையை கொண்டிருத்தல் .
அனைத்து வெளிநாட்டு தொழிலாளர்களையும் அவர்களின் குடும்ப உறுப்பினர்களையும் பாதுகாக்கும் ஐக்கிய நாட்டு ஒப்பந்தத்தை மறு உறுதிபடுத்துதல் .

அமைப்புகளை உருவாக்கும் உரிமை

தேசிய அளவில் தொழிலாளர்கள் விருப்பப்படும் தொழிற்சங்கம் அமைக்கும் வகையில் தொழிற்சங்க விதிமுறைகளை மறு ஆய்வு செய்து திருத்தும் செய்தல் .
எண் 87 இல் உள்ள சங்கங்களின் சுதந்திரத்தையும் அமைப்புரிமையின் பாதுகாப்பையும் குறித்த அனைத்துலக தொழில் அமைப்பின் ஒப்பந்தத்தை மறு உறுதிப்படுத்துதல் .

கனவான எதிர்ப்பார்ப்புகள் - பகுதி 1

2009-11-22T18:11:00.000-08:00

மாலை வேளை. நாற்காலியில் அமர்ந்தவாறே, கடந்து வந்த பாதையைத் திரும்பி பார்த்தாள் ரேவதி. கண்களில் நீர் கொட்டியது. இதயம் கனத்தது. இப்பொழுது வருத்தப் பட்டு என்ன செய்வது; எல்லாமே முடிந்து போய் விட்டதே.மறப்போம் என்றாலும் முடியவில்லையே. புண் ஆறினாலும் வடு மறையாது என்பார்கள். அது போல் ஆகிவிட்டதே ரேவதியின் வாழ்க்கை.

*************************************************************************************

ஒரே வீட்டில் தொடர்ந்தார்ப்போல ஐந்து பெண் குழந்தைகள் பிறந்தாலே அரசனும் ஆண்டி என்பார்கள். ரேவதி குடும்பமும் அதற்கு விதி விலக்கல்ல. ரேவதியின் வீட்டில் ஐந்து பெண் குழந்தைகள். ரேவதிதான் மூத்த பெண். அப்பா இறந்து வெகு நாட்களாகி விட்டன. அம்மாவும் ஒரு நோயாளி. வறுமை தலை விரித்தாடியது.

இதற்கெல்லாம் ஒரு விடிவுக்காலம் வராதா என்று ரேவதியும் அவளது தங்கைகளும் ஏங்கினர். ஒரு நாள் பத்திரிகையில் வெளிவந்த விளம்பரத்தைப் பார்த்தாள் ரேவதி.

" வெளிநாட்டில் வேலை வாய்ப்பு"
வெளிநாடுகளில் வேலை செய்ய இந்திய பெண்கள்
தேவைப்படுகிறார்கள். கை நிறைய சம்பளம். நல்ல
தங்கும் வசதி. நல்ல வாய்ப்பினை நழுவ விடாதீர்.
தொடர்புக்கு : ரவி ( 013 - 2345678 )

விளம்பரத்தை படித்த அவளுக்கு மிக்க மகிழ்ச்சி. எனக்கு இப்படியொரு வாய்ப்பு கிடைத்தால் ஏன் குடும்ப வறுமையே தீர்ந்து விடுமே ஏன் எண்ணினாள். குடும்பத்தினருடன் கலந்துரையாடி விட்டு, ஏற்பாட்டாளர்களை வெளிநாட்டுக்குப் புறப்படுவதற்கான ஏற்பாடுகளை மேற்கொண்டாள்.

குறிப்பிட்ட நாளில் குடும்பத்தினரிடமும், தெரிந்தவர்களிடமும் விடைப்பெற்றுக் கொண்டு விமானத்தில் ஏறி அமர்ந்தாள். அங்கே எல்லாமே புதியதாகவும், புரியாத புதிராகவும் இருந்தது அவளுக்கு. அவளை போன்று மேலும் சில பெண்மணிகள் வேலை தேடி வெளி நாட்டிற்கு பயணித்துக் கொண்டிருந்தனர். மூன்று மணி நேரத்திற்கு பிறகு, சேர வேண்டிய விமான நிலையத்தை வந்தடைந்தாள்.

அங்கு அவளை அடையாளம் கண்ட ஓர் ஆடவர் தன்னை அறிமுகப்படுத்திய பிறகு, ரேவதியை அழைத்து சென்றார். ..

- தொடரும் ...

பெண்களும் தகவல் சுதந்திரமும்

2009-11-20T23:14:00.000-08:00

அறிவு என்பது சக்தியாகும். தகவலைப் பெறுதல் அறிவை திறக்கும் சாவியாகும். தகவல் சுதந்திரமில்லாவிட்டால் மக்களின் வாழ்க்கைப் பாதிக்கும் விஷயங்கள் குறித்து அவர்கள் மிகக் குறைவாகவே குரல் கொடுக்க முடியும். அவர்களுக்குத் தெரிவதற்கு முன் பெட்ரோலுக்கு 30 சென் அதிகமாகவே அல்லது சாலை வரி அதிகரிப்போ இவர்களிடம் கலந்தாலோசிக்காமலேயே எடுக்கப்பட்டுள்ளதை அறிவார்கள். அவர்களைச் சுற்றி என்ன நடக்கின்றது என கண்டிப்பாக அறிந்திருக்க வேண்டும்.

தகவல்கள் தடையின்றி கிடைக்கவிட்டால், அரசுகளும் கம்பெனிகளும் தங்களின் செயல்களுக்கு பொறுப்பேற்பது கஷ்டமாகும். இதன் விளைவாக இந்நிறுவனங்கள் தண்டனைகளின்றி தவறு செய்ய எதுவாக இருக்கும். சரியான தகவல்கள் இல்லையென்றால் பெண்கள் உட்பட மக்கள் தங்களுக்கென உண்மையறிந்து தேர்வுகளைச் செய்ய இயலாது.

முக்கிய பிரச்சனைகள்

தகவல் சுதந்திரத்துக்கு பொதுவான தடைகள் .

அடக்கு முறைச் சட்டங்களின் பயன்பாடு .

அச்சக பிரசுர சட்டம் 1984 , போன்ற அடக்குமுறைச் சட்டங்களில் பயன்பாடு. சமீபத்தில் 'சைனா பிரஸ் ''மூத்த ஆசிரியர்கள் இருவருக்கெதிராக இச்சட்டம் பயன்படுத்தப்பட்டது. ஒரு வீடியோ காட்சியில் நிர்வாணமாகத் தோப்புகரணம் போடுவது ஒரு சீன நாட்டு பெண் எனத் தவறாக செய்தி வெளியிட்டதற்காக ராஜினாமா செய்ய வற்புறுத்தப்பட்டன.

பொறுப்புடமையின்மையும் ஒளிவுமறைவின்மையும்

உள்நாட்டு அரசுகள் எவ்வாறு நிதியை செலவிடுகிறது என்பது குறித்து ஒளிவு மறைவின்றி வெளியிடும் பொறுப்புடைமை. (எட்ஜ் மலேசியா பத்திரிகையில் உள்நாட்டு சக்தி 22 டிசம்பர் 2003 )உள்நாட்டு அரசாங்கம் சிவி 13 மில் லியன் ஆண்டு வரவு செலவு கணக்கை எவ்வாறு கையாண்டது என்பது குறித்து தகவல் பொது மக்களுக்குத் தெரியது. அது எப்படி செலவிடப்பட்டது குறித்து அவர்கள் ஒன்றும் கருத்துரைக்க முடியாது.

திருத்தங்கள் செய்யப்பட வேண்டிய சட்டம் குறித்து போதிய தகவலின்மை .

இச்சட்டங்கள் அடிக்கடி மிக விரைவாக நாடாளமன்றத்தில் ஏற்றுக்கொள்ளப்படுகின்றன. இந்த மசோதாவைப் பற்றி விவாதித்து தங்களின் கருத்துக்களைத் தெரிவிக்கும் வாய்ப்பு பொது மக்களுக்கு மறுக்கப்படுகிறது. இதனால் மலேசியா குடிமக்களின் ஜனநாயக பங்ககெடுப்பு உரிமை குறைக்கப்படுகின்றது.

தகவல் சாதனைங்கள் அடக்குமுறைச் சட்டங்கள் கட்டுப்படுத்தப்படுகின்றன.

அரசாங்கம் பத்திரிகை ஆசிரியருக்குரிய கொள்ளைகள் மீது அதிகாரம் செலுத்துகிறது. அடிக்கடி தணிக்கைக்கும் உள்ளாகின்றது. சிறப்பாக தகவல்களை பொதுமக்களுக்கு வழங்கிட கஷ்டமாகிறது. மிகக் கடுமையாக சூழ்நிலையில் அச்சக பிரசுர சட்டம் 1984 யைப் பயன்படுத்தி பத்திரிகையோ நிறுத்தி முடியும்.

. கல்வி சார்ந்த சுதந்திரமின்மையும் அடக்குமுரைச்சுழலும்

பல்கலைக்கழகங்களிலும் , பல்கலைக்கழகங்கள் வழியும் , பல்கலைக்கழக கல்லூரி சட்டம் 1971 வழியும் ஒப்பந்தமும் தகவல் வழங்குதளுக்கும் பெறுதலுக்கும் தடையாக உள்ளன.

2 பெண்கள் தகவல்கள் பெற மேலும் தடைகள்

. கடனுதவியும் மற்ற உதவி வசதிகளும் இருந்தும் , சொந்தத் தொழில் செய்ய விரும்பும் பெண்களுக்கு இப்படியான உதவிகள் இருப்பதே அல்லது இவற்றை எப்படி பெறுவது என்றே தெரியாமல் இருக்கின்றன .

. 4 மில்லியன் கிராமப்புற பெண்கள் கல் வியின்மையிலும் வறுமையிலும் இருப்பதால் அரசுக் கொள்ளைகள் , திட்டங்கள் , நிகழ்சிகள் வசதிகளினால் நன்மையடைவது கஷ்டமாகயுள்ளன . (மகளிர் , குடும்ப மேன்பாடு அமைச்சு ,2003)

. 52% பெண்கள் வாக்களிக்கத் தகுதியுடையவர்கள் . ஆனால் பெரும்பாலோருக்கு தாங்கள் வாக்களிக்கும் வேட்பாளர்கள் குறித்து அதிகம் எதுவும் தெரியாது . இம்மாதிரியான தகவல்கள் கடுமையாக கட்டுப்படுத்தப்பட்டுள்ளன . தகவல் சாதனங்களில் எளிதாகவும் கிடைக்காது . ஆண்களை போல் அதே வாய்ப்புகள் இருத்தும் பெண்களுக்கு இத்தகவல் மற்ற இடங்களிருந்து கிடைப்பதில்லை .[எ.கா அரசியல் கூட்டங்கள்]. [மலேசியா அரசு சார்பற்ற அமைப்பான பெண்களுக்கு எதிரான அனைத்து வகையான பாதங்கள் மீதான மாநாடு ]

. முடிவெடுக்கும் அமைப்புகளில் பெண்களின் குறைவான பிரதிநிதித்துவம் இருப்பதால் சட்டம் மீதான தகவல்கள் , கொள்ளைகள் , திட்டங்கள் , நிகழ்சிகள் மற்ற பெண்களுக்கு குறைவாகவே சென்றடைகின்றன .

. அடிப்படை தொடர்பு சாதனமின்மை , தகவல் தொடர்பு சாதனத் துறைக்கு செலுத்தும் அதிகமான கட்டணம் , பழக்கமில்லாத தகவல் தொடர்பு சாதனத்துறை , இணைய பயன்பாட்டில் ஆங்கில ஆதிக்கம் , குறைந்தளவு கல் வியறிவு , கணினித் துறையில் பயிற்சி பெறும் வாயிப்பின்மையும் மேலும் பெண்கள் தகவல் பெறக் கஷ்டமாக உள்ளது .

. பெண்கள் சட்ட புறக்கணிப்புக்கு காட்டுப்பாட்டிற்கும் ஆளாகுவதால் இவர்களின் நடவடிக்கைகள் அடக்கபடுகின்றன . இவர்களின் சட்ட உரிமைப் பற்றியும் குறைவாக தெரிந்திருக்கின்றனர்.

. ஆண் /பெண் சமத்துவம் குறித்து சேகரிக்கப்பட்ட புள்ளி விபரங்கள் இல்லாமை பெண்அரசியல்வாதிகள் ஆண் /பெண் சமத்துவ வரவுசெலவு பட்டியலையும் பெண்களுக்கு நன்கு உதவக்கூடிய நிகழ்ச்சிகளையும் ஆதரிக்கத் தடையாக உள்ளது .

.தொடர்புசாதனங்கள் அடிக்கடி பெண்களை கருவிகளாகவும் பாரம்பரிய பாத்திரங்களிளுமே விவரிக்கின்றன .

3.நீங்கள் என்ன செய்யலாம் ?

.குழுக்கள் அமைத்து உங்களது தேவைகளைப் பற்றி விவாதியுங்கள் அல்லது அரசு சார்பற்ற அமைப்புகளின் பிராச்சரங்களில் பங்கு uகொள்ளுங்கள் .

.உங்கள் இடத்திலுள்ள நாடாளுமன்ற அல்லது சட்டமன்ற பிரதிநிதியை kநேரில் கண்டு அல்லது கடித வாயிலாக உங்கள் தேவையைத் தெரிவியுங்கள் .

.மகளிர் ,குடும்ப ,சமுக மேம்பாடு அமைச்சு ,கல்வி அமைச்சு ,தகவல் அமைச்சுக்கும் ,பிரதம மந்திரி இலாகாவிர்க்கும் எழுதவும் .

செயல்படத் தீவிரப்படுத்துங்கள்

.ஜனநாயக ஆட்சியையும் பெண்களின் மனித உரிமைகளை அனுசரித்தளையும் அடிப்படையாகக் கொண்ட தகவல் சுதந்திர சட்டம் இயற்றுதல் .

.பள்ளி ,பல்கலைநிலையம் ,கல்லூரி ,பல்கலைகழகப் பாடத்திட்டத்தில் விழிப்புணர்வு நிகழ்ச்சிகளை இணைத்தல் .

.அதிகமானப் பொறுப்பு உடமையும் ஒளிவுமறைவின்றியும் கொண்ட தகவல்கள் பொது மக்களை சென்றடைவதை உறுதி செய்ய ஒரு சக்தி வாய்ந்த கண்காணிப்பு முறையைக் கொண்டிருத்தல் .

.தகவல் பெறும் உரிமைகளையும் பேச்சு சுதந்திரத்தையும் அத்துமீறும் அடக்குமுறை சட்டங்களை ரத்து செய்தல் அல்லது கட்டுப்படுத்தும் சட்டத்தை மறு ஆய்வு செய்து திருத்தம் செய்தல் .

.பத்திரிக்கை ஆசிரியர் கொள்கைகளில் ஆண்/பெண் சமத்துவத்தை தூண்டும் ஒரு தகவல் சாதன வழிகாட்டி குறியீட்டை உருவாக்குதல் .அனைத்து பத்திரிக்கையாளர்களுக்கும் ஆண்/பெண் சமத்துவ பயிற்சியளித்தல். முடிவெடுக்கும் பதவிகளில் அதிகமான ஆண்/பெண் சமத்துவ உணர்வுள்ள பெண்களை முன்னேற்றுதல் .

.எல்லாத் துறைகளிலும் ஆண்/பெண் சமத்துவ ரீதியிலான புள்ளி விபரங்களை உறுதி செய்தல் .

.பொது வாழ்கையில் பிரஜைகளின் குறிப்பாக பெண்களின் பங்கெடுப்பை அனுமதிக்க ஜனநாயகமும் ஆண்/பெண் சமத்துவ உணர்வுள்ள ஆட்சி அமைப்பு முறையையும் செயல் முறையையும் உறுதி செய்தல் .

.அனைத்துலக மனித உரிமை ஒப்பந்தங்களை உறுதிபடுத்த ஏற்றுக்கொள்ளுதல்.